Foreldrafræðsla um tengsl, snertingu og merki barnsins – með verklegri kennslu í ungbarnanuddi
Nýtt námskeið fyrir verðandi foreldra
Fyrstu samskiptin við barnið hefjast löngu áður en það lærir að tala. Barnið tjáir sig með líkamanum, hreyfingum, svipbrigðum, hljóðum og augnsambandi og smám saman læra foreldrar að þekkja og skilja merki síns barns.
Á námskeiðinu fá verðandi foreldrar fræðslu og verkfæri sem geta hjálpað þeim að undirbúa sig fyrir fyrstu samskiptin og samveruna með barninu.
Fjallað er meðal annars um tengsl foreldris og barns, merki og þarfir ungbarna, samskipti og mikilvægi nærandi snertingar. Áhersla er lögð á að efla öryggi foreldra og skilning á því hvernig við getum hlustað á barnið, fylgst með merkjum þess og brugðist við þeim af næmni og virðingu.
Snerting og ungbarnanudd
Ungbarnanudd er góð leið til að kynnast nærandi snertingu og getur orðið fallegur hluti af samskiptum og samveru foreldris og barns.
Á námskeiðinu læra foreldrar róandi nuddstrokur ásamt fyrirbyggjandi aðferðum til að minnka líkur á óþægindum í maga, eins og til dæmis lofts í meltingarvegi.
Verðandi foreldrar fá tækifæri til að læra og æfa handtökin í þægilegu og rólegu umhverfi áður en barnið fæðist. Hvert par fær sérhannaða nudddúkku til að æfa sig á.
Áherslan er ekki eingöngu á nuddstrokurnar sjálfar heldur einnig á samskiptin sem eiga sér stað í gegnum snertingu – að fylgjast með barninu, læra að þekkja merki þess og virða þarfir þess og mörk.
Skráning fer fram hér á heimasíðunni undir „Bóka tíma“
Á námskeiðinu færðu meðal annars:
- fræðslu um fyrstu tengsl og samskipti við barnið.
- aukinn skilning á merkjum og þörfum ungbarna.
- fræðslu um nærandi snertingu og mikilvægi hennar í samskiptum.
- verklega kennslu og æfingu í ungbarnanuddi.
- verkfæri sem þú getur tekið með þér inn í fyrstu vikur og mánuði foreldrahlutverksins.
Markmiðið er að þú farir af námskeiðinu með aukna þekkingu, verkfæri og öryggi til að byrja að kynnast þínu eigin barni.
